Ахсынньы 12 күнүгэр 2025с. Хатырыктааҕы оҕо искусствотын оскуолатын 50 сыллаах үбүлүөйдээх күнүн бэлиэтээтибит. Бу күн оскуола туһунан кинигэ сүрэхтэннэ манна музыкальнай оскуола историята, үлэлээн ааспыт педагоктар ахтыылара киирдэ. Бу кинигэ үйэлэргэ өйдөбүнньүк буолан кэлэр кэнчээри ыччакка историяны кэрэһэлиир өйдөбүл буолуоҕа.
Оскуола историятын кэпсиир эбит буоллахха 1975 сыллаахха Хатырык нэһилиэгэр Барылас учаастагар икки уопсайдаах дьиэҕэ тэриллибитэ. Бу музыкальнай оскуоланы тэрийэргэ көҕүлээбит дьонунан буолаллар, ол саҕанааҕы Хатырык сэбиэтин бэрэссэдээтэлэ Татаринов Иннокентий Афанасьевич уонна Хатырык орто оскуолатын дириэктэрин солбуйааччыта Матрена Николаевна Попова. Кинилэр оҕолор музыка эйгэтигэр сайдалларыгар, улахан сыал — сорук туруоран туруорсан маҥнайгы хардыы оҥорбуттар.
Бастакы дириэктэр соҕурууттан кэлбит Подхватилин Александр Александрович буолар. Биир сыл үлэлээбитин кэнниттэн, саҥа үөрэхтэрин бүтэрбит, Николай Николаевич Атласов кэргэнинээн Зинаида Никитичналыын үлэлии кэлбиттэрэ. Кинилэр уон сыл үлэлиир кэмнэригэр, хас даҕаны инструментальнай кылаастары арыйбыттара. Оҕолор, улахан дьон оркестрын, тыыннаах бөлөхтөрүн тэрийэн, Хатырык нэһилиэгин култууратын инники күөҥҥэ таһаарбыттара. Бу кэмтэн оҕо искусствотын оскуолатыгар элбэх оҕо үөрэнэн, уһуйуллан кынаттанан тахсан искусство араас идэтин баһылаан тахсаннар махтанар выпускниктар элбэхтэр. 2009 сыллаахха культура үтүөлээх үлэһитэ — Николай Николаевич Атласов аата букатыннаахтык иҥэриллибитэ. Билигин бу филиалга биэс учуутал таһаарылаахтык үлэлии-хамныы сылдьаллар.
Бу 50 сыл иһигэр тыһыынчаттан тахса оҕо музыка уонна искусство эйгэтигэр уһуйуллан, сайда улааттылар. Идэ оҥостубут выпускниктарбыт куруук махтал тылларын тиэрдэллэр.
Хатырыкпыт, Наммыт улууһа уонна Өрөспүүбүлүкэбит култуурата, искусствота сайдарыгар, инники кэскиллээх буоларын туһугар бэриниилээхтик үлэлии туруохпут диэн эрэнэбин! диэн коллектив бэйэтин баҕа санаатын үллэстэр.