Уйбаан 1937 сыллаахтан начальнай кылаастан учууталлааһынынан саҕалаан, олох үөһүгэр киирбитэ. ол сырыттаҕына саҥа тэриллибит, туох да базата суох, Ворошилов аатынан колхоз кулуубугар анаабыттара. Итиннэ икки сылын үлэлээн истэҕинэ, Якутскайга культура үлэһиттэригэр аналлаах курска ыыппыттара.
Итинтэн саҕаламмытауол ыра санаата олоххо киириитэ. Курсаннартан оонньуур дьоҕурунан, бэйэтин сыалын ситиһэргэ дьулуурдааҕынан үрдүктүк сыаналанан Иван Попов Саха государственнай театрыгар артиһынан үлэҕэ хаалларыллыбыта. Оччолорго Ньурбатааҕы колхознай театрга эдэр артистар бөлөхтөрүн кытары Иван бииргэ үлэлии барсыбыта. Бүлүү өрүс сүнньүгэр сытар оройуоннар олохт оохторугар театр эдэр артистара кэрийэ сылдьан, нэһилиэнньэ сынньалаҥын тэрийиигэ, дьону үлэҕэ- хамнаска өрө күүрдүүгэ сыламтата суох ылсыбыттара. Кинилэр гастроллуур кэмнэригэр колхозтаахтары кытары күнүһүн бииргэ үлэлэһэллэрэ, киэһэтин кулууптар сыаналарыгар көрсүһэллэрэ. Иван Попов А.Софронов «Тапталыгар» Күлүгү, «Дьадаҥы Дьаакыпка» Уйбааны толоруутун Бүлүү, Үөһээ-Бүлүү, Ньурба, Сунтаар оройуоннарын дьоно-сэргэтэ бэркэ биһирии көрсөллөрө.
Колхознай театрга сылдьан, доруобуйатынан, дойдутугар эргиллэн кэлбитэ. 1946 сыллаахха эмиэ Ворошилов аатынан колхоз кулуубугар сэбиэдиссэйинэн анаммыта. Кулууп сэбиэдиссэйэ колхозтаах ыччаты көргө – нарга түмэ тардыыга, кинилэр талааннарын сөргүтүүгэ, нэһилиэнньэ элбэх үлэни ыыппыта.
Нөҥүө сылыгар Иваны культура оройуоннааҕы дьиэтигэр уус- уран салайааччынан өрө таһаарбыттара. Ол кэмнэртэн оройуоҥҥа культурнай олох үлэтэ- хамнаһа кэҥээн, тупсан барбыта. Кулууп үлэһиттэрэ нэһилиэктэри кэрийэ сылдьан сааскы ыһыы, от, бурдук хомуурун үлэлэригэр агитбиригээдэлэри тэрийэн тиийтэлииллэрэ.
1950 сыллаахха Иван Попов төрөөбүт -үөскээбит Хатырыгар библиотекаҕа үлэлии кэлбитэ. Үлэтин тутарыгар Хатырык библиотеката 1409 кинигэлээҕэ. Итинтэн биэс сыл ааспытын кэннэ библиотека 305 ааҕааччылара 4700 кинигэни туһанар кыахтаммыттара. Туһааннаах уонна общественнай үлэлэргэ активнайдык кыттар Иван Иннокентьевиһы сельсовет председателин солбуйааччынан талбыттара. Онтон 1955 сылтан Хатырык нэһилиэгин Советын предсеталинэн быыбардаммыта. Кини Совекка председателлиир сылларыгар культурнай тэрилтэлэр материальнай базаларын бөҕөргөтөргө нэһилиэк күүһүн түммүтэ. Нэһилиэнньэттэн хомуллар үбү библиотека дьиэтин тутуутугар , саҥа аһыллар дьааһыла уонна оҕо саадын тэрээһинигэр анаабыта. Ол үпкэ тирэҕирэн, оройуоҥҥа бастакынан, Хатырыктааҕы сельскэй библиотекаҕа туспа дьиэ тутуллубута, кулууп дьиэтэ кэҥэтиллибитэ. И.И.Попов дьолу чахчы үлэттэн булбут, биһиги ытыктыыр дьоннорбутуттан биирдэстэрэ буолар.
М.Охлопкова
Ленин суола, 26.03.1974 с.