«Сайдам» норуот айымньытын дьиэтигэр олунньу 7 күнүттэн 12 күнүгэр дылы Саха Өрөспүүбүлүкэтин үтүөлээх артыыһа Екатерина Аркадьевна Саввинова- Саина «Саҥа тыын» бырайыага үлэлээтэ. Өр сыллаах баай уопутун, сөпкө тыыныы үөрүйэҕин үөрэттэ, ырыаҕа уһуйда, сыанаҕа туттуу -хаптыы кистэлэҥнэригэр такайда. Бу бырайыакка нэһилиэкпит дьоно — сэргэтэ оҕотуттан саҕалаан хото сырытта, ыаллыы Маймаҕа нэһилиэгиттэн күннэтэ кэлэн кытта дьарыктаннылар: Абашева Виктория Викторовна, Афанасьева Марина Ивановна – Күн Одун, Абашев Антон, Гоголева Галина Егоровна, Дьяконова Светлана Васильевна, Ефремова Елена Владимировна- Сандаарыйа Куо Алтаай кыыһа, Захаров Василий Егорович, Лазарева Ольга Николаевна, Макитова Аглаида Алексеевна, Наумова Парасковья Дмитрьевна, Павлова Анисия Егоровна, Осипов Алексей Прокопьевич, Шадрина Анжела Степановна, Ядрихинская Ирина Гаврильевна.
Олунньу 12 күнүгэр бырайыак кыттыылаахтара үөрүйэхтэрин көрдөрөр дьоро киэһэлэрэ буолла. Дьэ дуо, көрөөччүлэр соһуйуохтарын соһуйдулар, сөҕүөхтэрин сөхтүлэр. Кармен оператыттан саҕалаан нуучча эстраднай ырыалара кытта ылланнылар. Көрөөччү да, бырайыакка кыттыбыт дьоммут – сэргэбит астынан, дуоһуйан тарҕастылар. Кыттааччыларбыт ис туруктарын уһугуннаран, кыахтарын арыйан, араас уобарастарга холонон көрбүттэрэ барыбытын астыннарда.
