Саха итэҕэлинэн ыам ыйын 22 күнэ Иэйэхсит Хотун үөһэттэн сиргэ түһэр. Ол күнтэн сайыҥҥы күн саҕаланар. Саха омук күөххэ үктэнэн, сылы этэҥҥэ туораан саҥа сылы көрсөр үтүөкэн күнэ. Сир дойду уһун ууттан уһуктан, күөҕүнэн симэнэн, сайылык унаар буруота, ынах -сүөһү маҕырааһына, үөр сылгы кистээн дьырылатарыттан хайа саха үөрбэт буолуой?!
Бу күн Хатырыктар улаханныын — кыралыын бары мустан бэлиэтээтилэр. Баһылык Артур Егорович Ноговицын бар дьонун эҕэрдэлээтэ уонна Хатырык нэһилиэгин уус уран самодеятельноһын активнай кыттыылаахтарыгар “СР уус – уран самодеятельноһын ветерана” анал бэлиэни мелодистка, ырыаһыт А.Е.Левинаҕа, көмүс куоластаах ырыаһыттарбытыгар Д.И.Корякиҥҥа, П.А.Заровняевка, аар саарга аатырбыт “Уолан” ансамбль ырыаһыттарыгар И.Р.Поповка, Н.В.Слепцовка, А.Ф. Дьяконовка, И.В.Левиҥҥа, П.А.Петровка, В.Ф.Дьяконовка, П.П.Оконешниковка туттартаата. Бар дьон дохсун ытыстарын тыаһынан уруйдаатылар.
Тэрээһин саамай тыҥааһыннаах түгэнинэн «Сайылык күрэҕэ» буолла. Күрэххэ түөрт хамаанда кытынна: олохтоох дьаһалта, культурнай -спортивнай киин, М.К.Аммосов аатынан орто оскуола уонна хомуур хамаанда. Толору уулаах биэдэрэлээх сүүрүү, кыаһы өрүүтэ, сэппэрээтэри ыһыы- таҥыы, алаадьы тиэстэтин охсуу, алаадьы буһарыы. Үгүс ыһыылаах – хаһыылаах күрэххэ бастакы миэстэ- дьаһалта, иккис миэстэ- КСМФЦ, үһүс миэстэ- хомуур хамаандалара таҕыста. Ону тэҥэ дьахталларга кус үргээһинигэр хаһыс да сылын Т.Иванова иннин кимэхэ да биэрбэтэ уонна олохтоох дьаһалта туруорбут блендерынан наҕараадаланна. Корн- холл күрэҕэр Левин И.В. кыайан Ньуколуҥҥа сиир кустанан үөрдэ-көттө.
Хатырык «Эр Хоһуун» түмсүүтүн байанайдаах булчуттара сыллата тыыл ветераннарыгар, аҕам саастаахтарга кус бэрсэр. Быйыл да ол үгэстэн туора турбатылар уонна өссө миэстэтигэр кус миинин буһаран, мустубут бар дьоннорун күндүлээтилэр. Анаммыт кустары нэһилиэкпит кэрэ аҥардара ыраастаан бэлэмнээтилэр.
Ыллам ырыа, үҥкүү, оһуохай дьиэрэйдэ.
