Хатырык нэһилиэгэ туспа суоллаах-иистээх, үүнэр-сайдар кэскиллээх ыччаттаах, айар-тутар дьоҕурдаах дьонноох, сайдыы суоллаах Нам улууһун тутаах нэһилиэктэриттэн биирдэстэрэ.
Нэһилиэкпитигэр хас биирдии киһи кэскиллээх, хас биирдии киһи кыһамньылаах үлэтинэн бэйэтин кылаатын киллэрсэн Хатырык нэһилиэгэ күнтэн күн сайдар, тупсар, чэчириир.
Сэтинньи 22 күнүгэр М.К. Аммосов аатынан культура уонна духуобунай сайдыы дыбарыаһыгар Хатырык күнэ киэҥ далааһыннаахтык ыытылынна. Бу күн нэһилиэк ийэлэрин аатыттан Нам улууһун «Берегиня» дьиэ кэргэн иитиитигэр көмөлөһөр центр иитээччилэригэр анаан ,иитэр-үөрэтэр үлэҕэ көмө буолар матырыйааллары, остуол оонньуурдарын бэлэх ууннулар.
«Кэрэни кэрэхсиир кэрэ аҥардар» кэрэ аҥардарга тэттик тэрээһин ыыттылар. Манна биир дойдулаахтарбыт Павлова Екатерина Константиновна ротанынан корзина оҥорорго , Новгородова Софья Петровна туойунан харысхал оҥорууга, Заровняева Варвара Васильевна бэйэ сэбэрэни сөпкө көрүү-истии маастар кылаастара ыытылыннылар.
Онтон фойеҕа «Хатырыктан оҥоһуллубут» тыа хаһаайыстыбатын бородууксуйатын, уран тарбахтаахтар оҥоһуктарын атыы-эргиэн дьаарбаҥката ыытылынна. Мария Алексеевна Охлопкова аатынан модельнай библиотека уонна Максим Кирович Аммосов аатынан СӨ историятын түмэлэ холбоон Хатырык историятын кэпсиир ис хоһоонноох быыстапка тэрийдилэр.
Киэһээ 18:00ч. дыбарыаска «Хатырыктан эҕэрдэ» улахан кэнсиэр ыытылынна. Манна нэһилиэкпит уус-уран самодеятельноһын кыттыылаахтара, Хатырыктан кынаттанан тахсыбыт айар талааннаах биир дойдулаахтарбыт кыттыыны ыллылар. Кэнсиэр бириэмэтигэр Хатырык нэһилиэгин дьоно тыа хаһаайыстыбытын бородууксуйатын, уус-уран оҥоһуктарын спонсордааннар сүүйүүлээх оонньуу оонньонно. Кэлибит ыалдьыт, күндү көрөөччү дьоммут, биир дойдулаахтарбыт үөлээннээхтэрин, доҕотторун-атастарын көрсөннөр үөрэ-көтөн тарҕастылар.
Бу курдук бары биир сомоҕо буоламмыт дойдубут аатын ааттатан, хайдах туох үлээн-хамнаан, сайдыы суолун тутуһан олох хаамыытынан хардыылаҺан иһэрбитин сырдатан, көрдөрөн кэпсээн аастыбыт.
Чахчыта бүттүүн нэһилиэкпит салайааччылара, специалистара, общественность, тэрилтэлэрбит салайааччылара, уус-уран самодеятельность кыттыылаахтара, ону тэҥэ спонсор буолбут дьоммут бары түмсүүлээхпитин көрдөрдүбүт уонна маннык сомоҕо буоламмыт кыахпыт баарын бигэргэттибит
Хас биирдии сүүрсүбүт, кыттыспыт, тэрийсибит бар дьоммутугар ис сүрэхпититтэн махталбытын тиэрдэбит!
