2026 сыл-Россияҕа норуоттар сомоҕолоһууларын, Саха республикатыгар – Культура, Нам улууһугар уһулуччулаах судаарыстыбаннай уонна политическай деятель Илья Егорович Винокуров 130-сылынан уонна дьиэ кэргэн экономикатын сайдыытынан, Хатырык нэһилиэгэр үөрэҕирии уонна культурнай нэһилиэстибэ биллэриллибитэ.
Олунньу 5 күнүгэр сылбытын арыйар үөрүүлээх тэрээһиммит буолла. Бу күн улууспут салайааччылара үөрэх управлениятын начальнига М.С.Игнатьева, НКТЭ тэрилтэтин салайааччыта Н.В.Игнатьев күндү ыалдьыт буоллулар.
Тэрээһин театрализованнай дьүһүйүүттэн уонна «Хатырык нэһилиэгэ» тыа сирин түөлбэтин баһылыга А.Е.Ноговицын бар дьонун эҕэрдэлээһиниттэн саҕаланна.
Сыл логотибыгар нэһилиэк иһинэн күрэх биллэриллибитин уонна кыайыылааҕы баһылык солбуйааччыта А.А.Дьяконов биллэрдэ. Кыайыылааҕынан Баишева Ирина Павловна таҕыста уонна анал бирииһи тутта. Бирииһи “Тур выходного дня” туристическай кластер (салайааччы Ефремова Е.В.) туруорда.
Сыыйа бииртэн биир сонун нүөмэрдэр бэйэ — бэйэтин ситэрсэн -хоторсон истилэр, сылбыт ис хоһоонун толору арыйдылар.
Түмүгэр кэнсиэртэн киирбит уонна эрдэттэн нэһилиэнньэ бэйэтэ хомуйбут харчытын баһылык А.Е.Ноговицын көҥүл тустууга Россия кубогар туста барар кэскиллээх спортсмен оҕолорбутугар Айсиэн Ивановка, Алеша Парниковка, Леня Тимофеевка бар — дьон ытыһын доҕуһуолунан оҕолорго, төрөппүттэригэр туттарда. Тэрилтэ салайааччылара, биирдиилээн нэһилиэк олохтоохторо, ыалдьыттарбыт алгыс тылларын эттилэр, материальнай көмөлөрүн туттардылар.
Кырдьык да сомоҕолоһуу сыла Хатырыктар үөрүүгэ да, ыксаллаах кэмҥэ да түмсүүлээхтэрин көрдөрдө. Өрүүтүн да түмсүү, сомоҕолоһуу үчүгэйгэ, ситиһиигэ кынаттыы турдун!
