Кулун тутар 26-27 күннэригэр Нам улууһугар М. К. Аммосов аатынан дыбарыаска оскуола иһинэн үлэлиир театральнай коллективтарга «Мир театра- театральная летопись» аһаҕас республиканскай көрүү күрэҕэ буолла. Бырайыак ааптара режиссер -Роман Герасимов.
М. К. Аммосов аатынан орто оскуола «Ситим» театральнай бөлөхтөрө сыллата ситиһиилээхтик кыттар. Салайааччыларынан саха тылын учуутала Любовь Семеновна Татаринова, режиссерунан Ульяна Геннадиевна Наумова үлэлииллэр. Оҕолор быйыл үөрэнэр оскуолаларын юбилейыгар анаан «Үөрэх, билии сырдык суолунан» диэн ааттаах оскуолаларын музейын материалыгар олоҕуран суруллубут инсценирлвканы оонньоон көрдөрдүлэр.
Хатырык олохтооҕо убаастыыр учууталбыт, сэрии ветерана Слепцов Алексей Иванович суруйбут ахтыытыгар – Попов Георгий Иннокентьевич, Хатырык олохтооҕо, Намҥа салайар үлэҕэ олорон, нэһилиэнньэ мунньаҕар 1927 сыллаахха Хатырыкка оскуола аһылларын туһунан боппуруоһу туруорбута. Оччолорго колхоз бэрэссэдээтэлэ — Охлопков Василий Петрович -Чаҥыс буолла.
Г.И.Попов оруолун 8 кылаас үөрэнээччитэ Толя Тимофеев, кини оҕо эрдэҕинээҕитин 8 кылаас үөрэнээччитэ Мичил Бусаинов бэрт итэҕэтиилээхтик оонньоотулар. Георгий ийэлээх аҕатын Алина Григорьева, Кеша Иванов толордулар. Чаҥыс оруолун 10 кылаас үөрэнээччитэ Тимур Попов, Максим Аммосовы Дамир Мухин, кырдьаҕас оҕонньору Марик Стручков кыайа – хото туттулар.
Бу Поповтар сыдьааннарыттан үгүс көлүөнэ учуутал үүнэн — сайдан тахсыбыта. Сүрүн оруолга учуутал уобараһын 10 кылаас үөрэнээччитэ Кира Иванова толордо.
Массовкаҕа 7, 8, 10 кылаас оҕолоро оонньоотулар. Көрүү түмүгүнэн үһүс степеннээх дипломунан наҕараадаланнылар.
